BMT-nin hazırkı prezidenti: “Dünya yeni pandemiyalara hazırlaşmaq üçün əməkdaşlıq etməlidir”

“Dünya ölkələri koronavirus vəziyyətindən dərs almalı və gələcək pandemiyalara hazırlaşmaq üçün ən yüksək səviyyələrdə daha yaxından işləməlidirlər”.

“Report” xəbər verir ki, bunu BMT Baş Assambleyasının hazırkı, 78-ci sessiyasının prezidenti Trinidad və Tobaqonun sabiq Baş naziri və beynəlxalq təşkilatın yanında daimi nümayəndəsi Dennis Frensis bəyan edib.

“Düşünürəm ki, bu pandemiyanın bizə verdiyi dərslərə diqqət yetirməliyik. Bundan əvvəl, pandemiya təxminən 100 il əvvəl baş verdi. Bununla belə, elm adamlarının xəbərdarlıq etdiyi kimi, pandemiyaların daha çox yayılacağı və daha intensiv ola biləcəyi ehtimalı var. Biz beynəlxalq birlik olaraq pandemiyaya hazırlıq və idarəetmə məsələsinə diqqət yetirməliyik. COVID-19 pandemiyası ilə aydın oldu ki, bizim daha yüksək səviyyəli beynəlxalq əməkdaşlığa ehtiyacımız var”, - deyə Dennis Frensis vurğulayıb.

Frensis həmçinin qeyd edib ki, beynəlxalq ictimaiyyət peyvənd məsələsində daha çox həmrəylik nümayiş etdirməlidir: “Çünki bir bölgə və ya bir nəfər peyvəndsiz qalsa belə, bu, dünya əhalisinin qalan hissəsi üçün təhlükə yaradacaq”.