Məcburi köçkünlərin müvəqqəti məskunlaşdıqları mənzillərlə bağlı araşdırma aparılacaq
Bakı şəhərinin Suraxanı rayonunun Qaraçuxur qəsəbəsindəki M.Fətəliyev küçəsində yerləşən binadakı məcburi köçkünlərin müvəqqəti məskunlaşdıqları mənzillərin məxsus olduğu bir qrup vətəndaş iyunun 21-də Qaçqınların və Məcburi Köçkünlərin İşləri üzrə Dövlət Komitəsində olublar.Komitədən APA-nın sorğusuna cavab olaraq bildirilib ki, əvvəlcə komitənin Aparat rəhbəri Eldar Zeynalov, sonra isə komitə sədri Rövşən Rzayev vətəndaşlarla görüşərək, onları dinləyib və müvafiq izahat verib.
Bildirilib ki, komitənin aidiyyəti şöbəsinin əməkdaşları vətəndaşların müraciətləri əsasında həmin ünvanda bir daha araşdırma aparacaqlar. Araşdırmalardan sonra müvafiq tədbirlər həyata keçirilməsi üçün yuxarı dövlət orqanlarına müraciət ediləcək və nəticəsi haqqında vətəndaşlara məlumat veriləcək.
