Siyavuş Novruzovdan Bakıda yaşayan ermənilərlə bağlı sensasion açıqlama: “Araşdırma aparılır”

“Azərbaycanda ”beşinci kolon", təbii ki, var və bu, məni də narahat edir".
 
Milli Məclisin komitə sədri, YAP icra katibinin müavini Siyavuş Novruzov bunu açıqlamasında deyib.
 
Hakim partiyanın təmsilçisi qeyd etdi ki, hazırda o, mühüm bir məsələ ilə bağlı araşdırmalar aparır: “Uzun illərdir deyilir ki, Azərbaycan paytaxtında 30 mindən artıq erməni yaşayır.  Birinin arvadı, birinin qaynanası, digərinin nənəsi ermənidir. Bu gün sosial şəbəkələrdə anti-dövlət, antixalq, antimillət fikirlər yayan, xalqı aşağılayan fikirlərin böyük əksəriyyəti həmin adamlara məxsusdur”.  S.Novruzov qeyd edib ki, söhbət çox ciddi təhlükədən gedir: “Bunlar artıq ölkəmizin altında olan bir bombadır. Həmin şəxslər həm ayrı-ayrı dairələrə informasiya ötürür, həm bu və ya digər şəkildə dövlət strukturlarına soxulmaq, orda fəaliyyət göstərmək istəyir və fəaliyyət göstərənlər də var. Xaricdə oturan, ”sapı özümüzdən olan baltalar" ki var, onların əksəriyyətini yoxlasan, qanında erməni qarışığı olduğu aydınlaşar".
 
Komitə sədri hesab edir ki, bunlarla mübarizə və  həmin şəxsləri ifşa hər kəsin işi olmalıdır: “Hər bir vətəndaş bunlarla mübarizə aparmalıdır”.  S.Novruzov  dedi ki, hələ illər öncə Bakıda 30 min erməninin yaşadığı məlum idi: “İndi onların övladları, nəvə-nəticələri var, familiyalarını dəyişiblər, yaşayırlar. Bu yaxınlarda Sabunçu rayonunda bir nəfər mənim çıxışımla əlaqədar status yazmışdı. Dedim mən bu adamı tanımıram, bu da məni tanımır, axı, bu, kimdir, nəçidir? Onunla bağlı ciddi araşdırma apardım. Araşdırdım ki, bu adamın anası ermənidir. Xalası məhkəmələrin birində işləyir, hakimdir. Familiyasını dəyişib, bir dənə Elyenora adını saxlayıb, artıq kimliyi bəllidir. Onun mənimlə mübarizədə məqsədi mənimlə mübarizə deyildi, erməni-Azərbaycan münasibətidir”.
 
S.Novruzov bildirdi ki, hələlik Bakıdakı ermənilər bizimlə sosial şəbəkələrdə döyüşürlər: “Hələ ki, üzə çıxa bilmirlər. Amma mən hesab edirəm ki, onlarla çox ciddi şəkildə mübarizə aparmaq lazımdır. İndi doğrudan da hüquq-mühafizə orqanları çox gözəl işləyir, təhlükəsizlik xidməti yerindədir və yüksək səviyyədə fəaliyyət göstərir, Daxili İşlər Nazirliyi, digər strukturlar hər biri. Amma bu qurumlara dəstək lazımdır. Təkcə həmin qurumların fəaliyyəti ilə kifayətlənmək olmaz, vətəndaşlarımızın hər biri belə ünsürlərə qarşı mübarizə aparmalıdır. Məsələn, Gəncədə qonşudurlar, bilir ki, qonşu ermənidir. Baba deyir ki, qonşunun nənəsi ermənidir. Bunları bilirlər və ifşa etmək, ortaya çıxartmaq lazımdır.
 
YAP-çı deputat əlavə etdi ki, ayrı-ayrı dövlət qurumlarında da müvafiq araşdırmalar aparmaq lazımdır: “Araşdırma aparıb tapa bilərik ki, dövlət qurumlarında kimdir informasiyaları ötürən, bu işlərlə məşğul olan. İstər Bakıda, istər rayonda, istər kənddə yaşayan belə adamların əsl-kökünün kimliyi araşdırılmalıdır. Ən azı onun yeddi arxa dönənini tanıyanlar var. O baxımdan da vətəndaşların üzərinə dövlətçiliyin qorunmasında mühüm vəzifələr düşür”. “Yeni Müsavat”