İstanbulda Avropanın ən hündür teleqüllələrindən biri satışa çıxarılır

İstanbulun Büyükçekmece rayonundakı Endem televiziya qülləsi 1-ci İcra Bürosu tərəfindən satışa çıxarılacaq.

230 metr uzunluğundakı tikiliyə 249 milyon 395 min 434 TL (təxminən 20 milyon manat) qiymət təyin olunub.

Məlumata görə, qüllənin satışına 1 avqust 2023-cü ildən etibarən başlanacaq. Endem İnşaat tərəfindən tikilən və 15 ilə yaxın istifadə olunmayan binada dönərxana, restoran, kafe, bar, baxış meydançası da var. Qüllənin həmçinin baxış meydançasına 60 saniyəyə çata bilən 2 lifti, girişdə avtodayanacağı var.

Xatırladaq ki, televiziya qülləsi 10 mart 2017-ci ildə 7 nəfərin həyatını itirdiyi helikopter qəzası ilə gündəm olmuşdu.
Qeyd edək ki, Endem televiziya qülləsi hündürlüyünə görə Avropada 4-cü, dünyada isə 17-cidir.

Mənbə: Haber Global