Eyfel qülləsi paslanıb: Təhlükəli zədələr var
Parisin əsas görməli yerlərindən biri olan Eyfel qülləsi paslanıb və əsaslı təmirə ehtiyacı var. Lakin əvəzində Parisdə 2024-cü ildə keçiriləcək Yay Olimpiya Oyunları ərəfəsində yenidən rənglənir.Bu barədə Fransanın “Marianne” jurnalı öz mənbələrinə istinadən yazıb.
Jurnalın əldə etdiyi gizli məlumatlara görə, Eyfel qülləsində çatlar və paslar hələ 2014-cü ildə aşkar edilib. 2016-cı ildə qüllədə 884 zədə qeydə alınıb ki, bunlardan 68-i “konstruksiyanın dayanıqlığına təhlükə yaradır”.
“Əgər Qustav Eyfel [qüllənin inşaat mühəndisi] bu məkanı ziyarət etsəydi, o, infarkt keçirərdi”, - deyə adının açıqlanmasını istəməyən qüllənin meneceri jurnala bildirib.
