Estoniya “Rail Baltic” layihəsinin maliyyələşdirilməsinə 200 milyon avro ayıracaq

Estoniya hökuməti istixana qazı kvotalarının satışından əldə olunan gəlirdən 200 milyon avronu “Rail Baltic” beynəlxalq dəmir yolu layihəsinin maliyyələşdirilməsinə yönəldəcək.

"Report"un məlumatına görə, bu barədə ERR milli dövlət televiziya və radiosunun portalı xəbər yayıb.

"200 milyon avro “Rail Baltic”in tikintisinə, 75 milyon avro isə “Rail Baltic”in birgə deposu və Soodevaxda “Elron” qatarlarının operatoru olan dövlət şirkətinin tikintisinə yönəldiləcək", - portal ölkənin infrastruktur naziri Vladimir Svetin sözlərini sitat gətirib. Onun sözlərinə görə, bu, Tallinə layihə ilə bağlı tenderlərdə öz payını maliyyələşdirməyə imkan verəcək və Estoniyada “Rail Baltic” sahəsinin 2030-cu ilə qədər başa çatma ehtimalını artıracaq.

Bununla yanaşı, Svet qeyd edib ki, bu məbləğə əlavə olaraq, 2030-cu ilə qədər Estoniya dəmir yolu layihəsinə daha 400-500 milyon avro sərmayə qoymalı olacaq.