Rusiya, İran, Suriya və Türkiyənin xarici işlər nazirləri görüşə hazırlaşırlar

Rusiya, İran, Suriya və Türkiyənin xarici siyasət idarələrinin rəhbərləri dördtərəfli formatda görüşəcəklər.

Bu barədə Rusiya Xarici İşlər Nazirliyindən bildirilib.

Qeyd edilib ki, Rusiya Türkiyə ilə Suriya arasında münasibətlərin normallaşmasına kömək edir və tezliklə İran danışıqlar prosesinə qoşulacaq.

2022-ci ilin sonunda Rusiya, Türkiyə və Suriya Müdafiə nazirliklərinin rəhbərləri Moskvada görüşüblər. Daha sonra Türkiyə və Suriya müdafiə nazirləri 11 ildən sonra ilk dəfə görüş keçiriblər. Rusiya xarici işlər nazirinin müavini Mixail Boqdanov xatırladıb ki, Moskvada üç tərəf gələcək birgə işi əlaqələndirmək üçün ekspert mexanizmi yaradıb və onun əsas istiqamətlərini müəyyənləşdirib.

Daha sonra danışıqlar prosesinə İran da qatılmağa qərar verib. Rusiya tərəfi İranın regional rolunu və Türkiyə və Suriya ilə əlaqələrinin xarakterini nəzərə alaraq bu təşəbbüsü dəstəkləyib. Boqdanov qeyd edib ki, həm Ankara, həm də Dəməşq Tehranla danışıqlara qoşulmağa razılaşıblar.

Onun sözlərinə görə, indi planlara xarici işlər nazirləri səviyyəsində dördtərəfli görüş daxildir, onun təşkilinə başlanılıb. Bütün iştirakçıların ümumi məqsədi var, o da Suriya ətrafında vəziyyəti həll etmək və Yaxın Şərqdə vəziyyəti sabitləşdirməkdir. Nazirlər Sergey Lavrov, Hüseyn Əmir-Abdullahian, Mövlud Çavuşoğlu və Faysal Mikdadın görüşünün vaxtı hələ müəyyən edilməyib.

Rusiya XİN rəhbərinin müavini izah edib ki, müdafiə nazirliklərinin rəhbərləri ilə ölkələrin xarici işlər nazirlikləri arasında təmaslar Suriya-Türkiyə danışıqlarının digər səviyyələrdə aparılması üçün zəmin hazırlayır. Boqdanov bildirib ki, danışıqlar potensial razılaşmaları ortaya çıxara bilər.

Diplomat əmindir ki, Ankara ilə Dəməşq arasındakı fikir ayrılıqlarını aradan qaldırmaq olar. Rusiya tərəfi vəziyyətin normallaşmasını yaxınlaşdıracaq həll yollarının axtarışına kömək etməyə davam edəcək.