Kannda ödənişsiz sualtı incəsənət muzeyi açılıb - FOTO
- 28-02-2021, 16:00
- Dünya
Fransız Rivyerasında, Kannda yeni sualtı incəsənət muzeyi açılıb.“Lonely Planet”in verdiyi məlumata görə, muzey Sent-Marqerit (Sainte-Marguerite) adasının yaxınlığında yerləşir və demək olar ki, iki metr hündürlükdə üz görünüşündə altı heykəldən ibarətdir.
Bunlar yerli sakinlərin, məsələn, 80 yaşlı balıqçının və ya doqquz yaşlı ibtidai sinif şagirdinin “portretləridir”.
Heykəllər üç metrə qədər dərinlikdə yerləşir və hər birinin çəkisi təxminən 12 tondur.
Bu abidələri yaratmaq üçün britaniyalı sualtı rəssam Ceyson Deker Teylor dörd il vaxt sərf edib. Onlar Teylorun Aralıq dənizindəki ilk əl işi olub.
Hər bir heykəl üçün zərərli çirkləndiricilər ehtiva etməyən, zəhərli olmayan, pH neytral sementdən istifadə edilib. Bu əsərlər əslində mərcan, balıq və xərçəngkimilərin yaşaya biləcəyi süni qayalardır.
Onlar bura qayıqla gətirilib və dalğıclar tərəfindən kranların köməyi ilə quraşdırılıb. Dalğıclar artıq muzeyə giriş haqqı ödəmədən onların aralarında üzə bilərlər.
