ABŞ-də qaradərili polis zorakılığının qurbanı olub
- 27-04-2024, 17:09
- Dünya
Bu barədə “Report” xarici mətbuata istinadən xəbər verir.
Aprelin 18-də Ohayo ştatının Kanton şəhərində yol qəzası törədib, qaçdığı iddia edilən qaradərili amerikalının polis zorakılığı nəticəsində ölməsinin görüntüləri bu gün ictimaiyyətə açıqlanıb.
Hadisəyə müdaxilə edən polis əməkdaşlarının kameralarından lentə alınan görüntülər sosial mediada sürətlə yayılıb, olay 2020-ci ildə polis zorakılığı nəticəsində dünyasını dəyişmiş qaradərili amerikalı Corc Floydun ölümü ilə müqayisə olunub.
Görüntülərdə nəqliyyat vasitəsi ilə qəza törətdiyi iddiası ilə bufetdə polis tərəfindən saxlanılan Taysonun yerə yıxılaraq əlləri arxaya qandallanaraq polisi nəzərdə tutaraq, dəfələrlə “məni öldürməyə çalışırlar”, dediyi görünür.
Polisin dizi ilə boğazını sıxdığı, üzü üstü yerə uzanmış, əlləri qandallı olan qaradərilinin bir neçə dəfə “nəfəs ala bilmirəm” deməsi kameraya düşüb.
Bir neçə dəqiqə sonra polis əməkdaşı hələ də qaradərili kişinin sağ olub-olmadığını yoxlayır, Taysonun nəfəs almadığını anlayır və ürək masajı etməyə başlayır, sonra isə şübhəli şəxs təcili yardımla xəstəxanaya aparılır.
Polisin verdiyi məlumata görə, Tayson xəstəxanada ölüb, hadisədə iştirak edən asayiş keşikçiləri istintaqa təhvil verilib.
Xatırladaq ki, 2020-ci ildə qaradərili amerikalı Corc Floyd polis zorakılığı nəticəsində ölüb, hadisədən sonra ABŞ-də həftələrlə irqçilik və polis zorakılığı əleyhinə iri miqyaslı aksiyalar keçirildi.
