Dövlət qurumlarımızın sosial şəbəkələrlə bağlı yanlış mövqeyi
12-08-2020, 10:50. Разместил: azadses
Son zamanlarda dövlətimizə qarşı edilən təxribat xarakterli hücumlar və bunun fonunda baş verən hadisələrin aşkara çıxardığı bir çox mühüm məqamlar oldu. Bu məqamlardan biri də, bizim, cəmiyyət və toplum olaraq dövlətimizə qarşı açılan virtual cəbhəni, onun episentrində duran sosial şəbəkələri və oradan bizə gələ biləcək təhlükələri lazımi şəkildə dəyərləndirməməyimizlə bağlıdır.Bu gün demək olar ki, çoxlarından “sosial şəbəkələr həyatımızın ayrılmaz tərkib hissəsinə çevrilib” kimi şablon xarakterli fikirləri eşidirik. Əksəriyyətimiz bunu ciddiyə almayıb, ümumi bir fikir kimi qəbul etsək də, sosial şəbəkələr hər şeyi ciddiyə alaraq bütün mənfi və müsbət cəhətləri ilə həyatımızı zəbt etməkdədir. Ən xoşagəlməz tərəfi isə odur ki, istifadəçilərinin əhatə dairəsi gəncləşmə mərhələsini başa vurub, artıq sürətlə azyaşlı uşaqlar arasında prioritet məşğuliyyət növünə çevrilən sosial şəbəkələrə cəmiyyətimizdə, xüsusilə də bir çox dövlət qurumları tərəfindən adekvat münasibət sərgilənmir. Əsrlər boyu dövlətlər arasında müharibə meydanlarında gedən, sonradan iqtisadi platformaya keçid edən və daha çox müqəddəratı bu cəbhədə müəyyən olunan gərgin mübarizə prosesində, hazırda informasiya cəbhəsinin rolu sürətlə artmaqdadır. Bu sistemin ən münbit və güclü təsirə malik olan hissəsi qeyd etdiyim kimi sosial media, xüsusilə də sosial şəbəkələrdir. Real statistikaya görə bu gün, bütün cəmiyyətlərdə olduğu kimi bizdə də, 15 yaşdan 65 yaşa qədər olan insanlarımızın mütləq əksəriyyəti bu və ya digər sosial şəbəkənin istifadəçisidir. Sadə bir riyazi hesablama nəticəsində, söhbətin virtual bir məkanda da olsa, say baxımından başqa heç bir platformada reallaşdırılması mümkün olmayan böyük bir ordudan getdiyinin şahidi oluruq. Azərbaycan dövlətinin və xaqlının maraqları naminə həmişə vahidliyini və birliyini nümayiş etdirən xalqımızın, virtual platformada da dövlətçiliyimizin qorunması uğrunda hər an birləşəcəyi şübhəsizdir.
Təsadüfi deyil ki, bu ilin 20 iyul tarixində xalqımıza müraciət edən Birinci vitse-prezident sosial şəbəkələrin və informasiya müharibələrinin təhlükəliliyi, onların hadisələrin gedişatına təsiri ilə bağlı önəmini qeyd edərək bildirmişdir: “Unutmayaq ki, hər birimizin borcu Azərbaycanın mövqeyini müdafiə etməkdir. Nəinki döyüş meydanında, həm də kompüter qarşısında”.
Bu müraciətin edilməsində əsas məqsədlərdən biri də, real döyüşdə qəhrəman övladlarımızın mətinliyi və məğrurluğu qarşısında imkanları tükənən düşmənlərimizin, diqqətləri yayındırıb bizə qarşı virtual cəbhə aça biləcəklərini insanlarımıza çatdırmaqla bağlıdır. Bu cür mənfur addıma qarşı daim hazır olmağımız üçün, cəmiyyət və toplum olaraq vahid orqanizm şəklində hərəkət etməyimiz mütləqdir. Təbii ki, niyyət baxımından dünyanın harasında olmasından asılı olmayaraq vətəndaşılarımızın və soydaşlarımızın mütləq əksəriyyəti bu məsələdə eyni düşüncəni paylaşır. Sadəcə bir çox dövlət qurumlarımızın və onların rəhbərlərinin bu məsələ ilə bağlı tutduğu mövqe yanlışdır. Yanlışlıq ondan ibarətdir ki, bu qurumların tabeçiliklərində fəaliyyət göstərən və hər birinin bu vətənin potensial əsgəri hesab olunduğu on minlərlə əməkdaşlarının sosial şəbəkələrdə mövcudluqlarına qeyri-rəsmi də olsa qadağalar mövcuddur. Bu qadağaların qeyri ciddi məşğuliyyət və ya səmərəsiz vaxt itkisi amilləri ilə əsalandırılmasına baxmayaraq, bunu düzgün hesab etmirəm. Çünki, nəticədə əhatə dairəsi çox geniş olan həmin şəxslərin sosial mediaya girişini tam məhdudlaşdırmaq mümkün olmasa
da, onların sosial şəbəkələrin passiv iştirakçıları olmalarına şərait yaranır. Bununla da, say baxımından özümüzü çox böyük miqyasda virtual əsgərdən məhrum etməklə, əslində bu cəbhədə meydanı təxribatçılar və düşmənlərimiz üçün genişləndirmiş oluruq.
Ölkənin Birinci vitse-prezidentinin müraciətində də vurğulandığı kimi, bu gün Azərbaycan dövləti təkcə hərbçilərimizin hər an döyüşə hazır olduğu cəbhədə deyil, həm də ölkəmizə qarşı açılan virtual cəbhədə də, müharibə şəraitindədir. Və bu cəbhə, heç də digərindən az təhlükəli deyildir. Bu gün Azərbaycanımızın mövqeyini müdafiə etmək kimi öhdəliyə malik olan hər bir vətəndaşımız, dövlət qurumlarında, hüquq mühafizə orqanlarında və digər sahələrdə fəaliyyət göstərməsindən asılı olmayaraq doğal vəzifəsini layiqincə yerinə yetirmək üçün hər an və hər yerdə mübarizə aparmalıdır. Məlum müraciətdə də deyildiyi kimi, “nəinki döyüş meydanında, həm də kompüter qarşısında”. Bunun üçün də bütün dövlət qurumları və onların rəhbər şəxsləri əməkdaşlarını sosial şəbəkələrdə düşmənlərdən və təxribatçılardan tam fərqli olaraq, şəxsiyyətləri məlum şəkildə aktiv olmağa və virtual platformada da dövlətimizə xidmət etməyə nəinki şərait yaratmalı, hətta onları buna sövq etməlidirlər.
Politoloq Xəyal Bəşirov
Вернуться назад