Hindistanda parlament seçkilərinin birinci mərhələsi başlayıb
19-04-2024, 13:02. Разместил: azadses
“Report” TASS-a istinadən xəbər verir ki, yerli vaxtla səhər saat 07:00-da (Bakı vaxtı ilə saat 05:30) 21 ştatda yerləşən 102 seçki dairəsində 187 min seçki məntəqəsi işə başlayıb. Ölkənin 166 milyondan çox vətəndaşı səs verə bilər.
Ölkənin böyüklüyünü və seçicilərin sayının təxminən 1 milyarda çatmasını, habelə təhlükəsizlik mülahizələrini nəzərə alaraq, Hindistanda seçkilər yeddi mərhələdə keçiriləcək. Sonuncu isə iyunun 1-nə planlaşdırılıb. Səsvermənin nəticələri iyunun 4-dək elan olunacaq.
Seçkilərin birinci mərhələsi Hindistan parlamentinin aşağı palatasında - 543 yerdən ibarət Lok Sabhada kimin 102 yeri tutacağına qərar verəcək. Bu yerlər uğrunda 1 625 namizəd mübarizə aparır.
Qarşıdan gələn səsvermədə favoritlər arasında hakim Hindistan Xalq Partiyası (“Bharatiya Janata Parti”, BJP) da var, onun lideri ardıcıl üçüncü dəfə baş nazir olmaq istəyən Baş nazir Narendra Modidir. O, 28 milli və regional partiyanı birləşdirən müxalifət alyansı I.N.D.I.A. ilə rəqabət aparır, lakin heyətindəki əsas qüvvə Hindistan Milli Konqresidir. Sorğular BJP-nin qələbəsini proqnozlaşdırır.
Hindistan Seçki Komissiyası seçkilərin təhlükəsiz və rahat keçirilməsi üçün bir sıra qətiyyətli tədbirlər görüb. Seçki komissiyasının məlumatına görə, məntəqələrinin 50 %-dən çoxunda internet yayımı təşkil olunub, yüzlərlə müşahidəçi işləyir, təhlükəsizlik qüvvələri asayişə riayət olunmasına nəzarət edir.
Səsvermə saat 18:00-da (Bakı vaxtı ilə 16:30) başa çatmalıdır. Seçkilərin ikinci mərhələsi aprelin 26-da 13 ştatda yerləşən 89 seçki dairəsində keçiriləcək.
Вернуться назад