Nazir əvəzi: "Azərbaycan iqlim dəyişikliyinin təsirini yumşaltmaq üçün tədbirlər görüb"
15-02-2024, 17:16. Разместил: azadses
"Report" xəbər verir ki, bunu Bakıda "Vergi sistemi yeni inkişaf dövründə: Davamlı iqtisadiyyat üçün strateji hədəflər" mövzusunda keçirilən forumda ekologiya və təbii sərvətlər naziri vəzifəsini icra edən Muxtar Babayev bildirib.
O qeyd edib ki, iqtisadi fəaliyyət nəticəsində atmosfer havasına atılan istixana effekti yaradan qazların azaldılması, karbon kreditləri və karbon ticarəti sisteminin yaradılması və tənzimlənməsi məqsədilə qanun layihəsi hazırlanıb.
"Ətraf mühitə buraxılan zərərli qazların udulması və sağlam ekoloji mühitin yaradılması məqsədilə ölkədə meşə və yaşıllıq ərazilərinin genişləndirilməsi üçün kütləvi şəkildə ağacəkmə, meşə əkinləri və aqrobağların salınması işləri həyata keçirilir. Təkcə 2023-cü il ərzində ölkə ərazisində 4 milyona yaxın ağac əkilib", - deyə o əlavə edib.
"Müasir iqtisadiyyatda təkrar emal anlayışı mühüm yer tutur. Biz resurslardan səmərəli istifadə və dairəvi iqtisadiyyat siyasəti vasitəsilə təkrar emal təcrübələrini gücləndirməklə təbii ehtiyatların qorunması, davamlı istifadəsinə nail olmalıyıq. Təkrar emal biznesini qurmaq, innovativ texnologiyaları tətbiq edərək yaşıl istehsalla məşğul olmaq istəyənlər sahibkarlara Balaxanı Sənaye Parkında dövlət tərəfindən güzəştlər verilməklə əlverişli şərait yaradılıb. Hazırda Sənaye Parkında 25 rezident qeydiyyatdan keçib və burada tullantılardan xammal kimi istifadə edilərək hazırlanan məhsullar bir sıra ölkələrə ixrac olunur", - deyə nazir əvəzi vurğulayıb.
M.Babayev həmçinin bildirib ki, hazırda dağ-mədən sektorunda azad rəqabət mühitinin formalaşdırılması, şəffaflığın təmin edilməsi üçün yerin təkinin istifadəyə verilməsi İqtisadiyyat Nazirliyi yanında Əmlak Məsələləri Dövlət Xidməti ilə birgə hərraclar vasitəsi ilə keçirilir: "Mineral xammal bazasının öyrənilməsi, yataqların kəşfiyyatı, istismara cəlb olunması, işlənilməsi, bu sahədə yeni texnologiyaların tətbiqi, maddi-texniki bazanın müasirləşdirilməsi və dağ-mədən sənayesinin inkişafı istiqamətində işlər görülür, bütün filiz yataqları haqqında məlumatlar rəqəmsallaşdırılır.
Yerin təki sahəsi üzrə nəzarətin gücləndirilməsi məqsədi ilə İqtisadiyyat Nazirliyi yanında Dövlət Vergi Xidməti ilə birgə yataq sahələrində hasilat həcmlərinin müəyyən edilməsi, istismarçılar tərəfindən faydalı qazıntıların çıxarılmasına dair hesabatlılığın və ödənişlərin təmin edilməsi məqsədilə əməkdaşlıq və məlumat mübadiləsi həyata keçirilir. Vahid inzibatçılığın təmin edilməsi məqsədilə yerin təkindən istifadə ilə əlaqədar nəzərdə tutulan ayırma məbləğləri mədən vergisi dərəcələrinə uyğun hazırlanmış və "Yerin təki haqqında" yeni Qanun layihəsində nəzərə alınıb.
Mədən vergisi üzrə vergi ödənişləri təbii sərvətlərin hasilatının, onlardan səmərəli istifadənin, ətraf mühitə zərərli təsirlərin azaldılmasının və ekoloji tədbirlərin həyata keçirilməsinin tənzimləyicisi olmalıdır. Bu baxımdan istehsala görə ödənişlərin düzgün hesablanmasının, ödənilməsinin və təbii sərvətlərdən istifadə üzrə hesabatın verilməsinin əhəmiyyəti və zərurəti artır".
Вернуться назад