Özbəkistan Xəzər dənizində gəmilərinin olmasında maraqlıdır

Özbəkistan Xəzər dənizində öz gəmilərinin olmasında maraqlıdır və bu da Transxəzər Beynəlxalq Nəqliyyat Marşrutu üzrə yük daşımalarının artmasına kömək edəcək.

Bunu "Report"a açıqlamasında Özbəkistanın Nəqliyyat Nazirliyi yanında Nəqliyyat və Logistikanın İnkişafının Öyrənilməsi Mərkəzinin direktoru Bekzod Xolmatov bildirib.

O deyib ki, Özbəkistan Azərbaycanla birlikdə gəmiqayırma layihələrində iştirak etməkdə maraqlıdır: "Dənizə birbaşa çıxışı olmayan bir ölkə kimi, Özbəkistana donanmasının olması vacibdir”.

B. Xolmatovun sözlərinə görə, Daşkənd bu məsələdə digər ölkələrlə əməkdaşlığa hazırdır: "İndi biz Bakı limanında öz terminalımızın tikintisi üzərində işləyirik, bu isə bu təşəbbüsün əsasını təşkil edir. Üstəlik, Türkmənistan və Qazaxıstanla gəmiçilik sahəsində razılaşmalar gündəmdəki bütün məsələləri tez həll etməyə imkan verəcək”.

Xatırladaq ki, Özbəkistan okeanlara çıxış üçün azı iki dövlətin sərhədini keçməlidir. O, bu kateqoriyaya aid olan iki ölkədən biridir.