Azərbaycanda fındığın keyfiyyətinin artırılması üçün fəaliyyət planı hazırlanır
31-10-2023, 21:17. Разместил: azadses
Bunu “Report”a açıqlamasında BMT-nin Ərzaq və Kənd Təsərrüfatı Təşkilatının (FAO) Azərbaycandakı nümayəndəsinin köməkçisi Bariz Mehdiyev bildirib.
Onun sözlərinə görə, aflatoksin fındıqçılıqda istehsal və yığım prosesində yaranan xəstəlikdir: “Hazırda FAO tərəfindən həyata keçirilən “Azərbaycanda fındıqçılıq sahəsində səmərəliliyin və dayanıqlılığın sürətləndirilməsi” layihəsinin əsas məqsədlərindən biri məhz bu xəstəliyin təsirlərini azaltmaq üçün fermerlərin dayanıqlı fındıq becərilməsi, yığım sonrası emal və təhlükəsizlik üzrə potensialı yaxşılaşdırılmasıdır. Bu xəstəliklə mübarizə aparmaq üçün müasir metodlardan istifadə edilməsi məqsədilə layihəyə beynəlxalq qurumlar, tədqiqat institutları cəlb edilib. Əsas məqsədimiz - layihə çərçivəsində tək istehsalçıları deyil, bütün dəyər zəncirinin iştirkaçılarını cəlb etməklə onların saxlanma və digər zəruri tədbirlər haqqıda praktiki və nəzəri bilik və bacarıqlarının artırılmasıdır”.
B. Mehdiyev qeyd edib ki, Azərbaycan fındıq istehsalının ən böyük payına malik ilk 5 ölkə sırasına daxil olub: “Bu səbəbdən də Azərbaycan fındığının ixrac potensialı daha da artırmaq üçün potensial var”.
O bildirib ki, layihə çərçivəsində pilot olaraq fındıq istehsalı olan rayonlarda təsərrüfatlar seçilib, afratoksin xəstəliyi ilə mübarizənin aparılması üçün fermerlərə qabaqcıl kənd təsərrüfatı təcrübələrin (GAP) tətbiqi məsləhət görülür.
B. Mehdiyev deyib ki, bu yaxınlarda Bakıda “Fındıqçılığın inkişaf perspektivləri” mövzusunda beynəlxalq konfrans keçiriləcək: “Həmin konfransda layihə çərçivəsində istifadə olunan təcrübələr və layihənin yekunlaşdırılması ilə bağlı məlumatlar təqdim ediləcək. Müxtəlif ölkələrin təcrübələri ilə bölüşmək imkanı yaradılacaq”.
Bu layihənin ümumi dəyəri 1,3 milyon ABŞ dolları təşkil edir və əsas məqsədi mexanikləşdirmə texnologiyalarından istifadə etməklə fındıq istehsalının effektivliyini artırmaq və aflatoksin maddəsinin mövcudluğu riskinin azaldılmasına xüsusi diqqət yetirməklə, istehsal edilmiş fındığın keyfiyyətini yüksəltmək üçün kiçik fermerlərə qabaqcıl kənd təsərrüfatı təcrübələrini tətbiq etmək imkanı yaratmaqdır.
Hazırda Azərbaycanda 80 min hektardan çox ərazidə fındıq əkilir. Fındıq bağlarından 67 min tondan çox məhsul yığılır.
Bu ilin yanvar-avqust aylarında Azərbaycan 70,5 milyon ABŞ dolları dəyərində 14 min 144 ton meşə fındığı ixrac edib. Hesabat dövründə Azərbaycan Rusiyaya 34,1 milyon ABŞ dolları dəyərində (1 il əvvəlki göstəricidən 44 % çoxdur) 7 min 390 ton (+64 %), Almaniyaya 13,2 milyon ABŞ dolları dəyərində (+25 %) 2 min 347 ton (+40 %), İtaliyaya 9,3 milyon ABŞ dolları dəyərində (-60 %) 1 min 674 ton (-56 %), İsveçrəyə 4,7 milyon ABŞ dolları dəyərində (+5,5 dəfə) 780 ton (+5,6 dəfə), Türkiyəyə 1,9 milyon ABŞ dolları dəyərində (+18 dəfə) 376 ton (+18 dəfə) məhsul satıb.
Вернуться назад