Kanslerin partiyasını Bavariya və Hessedə keçirilən seçkilərdə məğlubiyyət gözləyir
8-10-2023, 08:53. Разместил: azadses
“Report” xəbər verir ki, seçkilərdə mühafizəkarların qalib gələcəyi proqnozlaşdırılır və kansler Olaf Şoltsun üzvü olduğu “Almaniya Sosial Demokrat Partiyası” hər iki halda tarixin ən pis nəticəsi ilə üzləşəcək. Sağçı “Almaniya üçün Alternativ” isə bəzi digər partiyalarla birlikdə hər iki əyalətdə ikinci yerə iddia edə bilər.
Hər iki federal torpaqda seçki məntəqələri saat 08:00-da (Bakı vaxtı ilə 10:00) açılacaq və 18:00-a qədər (Bakı vaxtı ilə 20:00) fəaliyyət göstərəcək. İlk exit-poll məlumatları seçki məntəqələri bağlandıqdan dərhal sonra dərc olunacaq. Səsvermə bülletenlərinin hesablanması zamanı rəsmi rəqəmlər gecə və bazar ertəsi açıqlanacaq.
Bavariya Almaniyanın ən böyük federal əyalətidir, ölkənin ümumi ərazisinin 20% -ni tutur, əhalisi 13,08 milyon nəfərdir. Orada 1954-cü ildən bəri hazırda lideri Bavariyanın Baş naziri Markus Söder olan “Xristian Sosial İttifaqı” bütün seçkilərdə qalib gəlib.
Son sorğulara görə, insanların təxminən 37%-i “Xristian Sosial İttifaqı”na səs verməyə hazırdır ki, bu da təxminən 5 il əvvəl olduğu kimidir. İkinci yeri seçicilərin 16%-nin səs verməyə hazır olduğu “Yaşıllar” partiyası tuta bilər.
Proqnozlara inansaq, “Almaniya Sosial Demokrat Partiyası” seçkilərdə təxminən 9% səs qazanacaq. Bu da partiya üçün ən pis nəticə olardı.
Əhalisinin sayı 6 milyondan bir qədər çox olan Hessedə sorğu iştirakçıları təxminən 32% səslə “Xristian Demokrat İttifaqı”nın qalib gələcəyini proqnozlaşdırırlar. “Yaşıllar” proqnozlaşdırılan səslərin 17-18%-i alsalar, mühafizəkarlarla birlikdə hökumətdə işləməyə davam edə biləcəklər.
“Almaniya Sosial Demokrat Partiyası” təxminən 17% səs toplaya bilər ki, bu da partiya üçün ən pis nəticə olacaq. Almaniyada regional siyasət, bir qayda olaraq, mərkəzi siyasətə birbaşa təsir göstərmir. Bu o deməkdir ki, bu seçkilər Berlin hökumətinin işinə heç bir faktiki təsir göstərməyəcək. Hər bir federal torpağın öz siyasi gündəliyi var və sakinləri ilk növbədə daxili siyasi və regional məsələlər narahat edir.
Вернуться назад