Anar Kərimov ICESCO-da Qarabağda məhv edilmiş mədəni abidələrimizdən danışdı
9-12-2021, 14:32. Разместил: admin
Misirdə rəsmi səfərdə olan mədəniyyət naziri Anar Kərimov ICESCO-nun Baş direktoru Salim bin Məhəmməd əl-Malik, Misirin Ali təhsil və elmi araşdırmalar naziri Xalid Əbdülğaffar və Baş müftisi Şövqi Allam ilə görüşüb.Mədəniyyət Nazirliyindən “Azadsəs.az”a verilən məlumata görə, hazırda isə mədəniyyət nazirinin rəhbərlik etdiyi nümayəndə heyəti səfər çərçivəsində ICESCO-nun Baş Konfransının 14-cü sessiyasında iştirak edir.
İclas zamanı çıxış edən A. Kərimov tarixi torpaqlarımız olan Qarabağda 30 illik işğal müddətində dağıdılmış, məhv edilmiş maddi və mənəvi irsimiz, tarixi abidələrimiz, dini məbədlərimiz barədə geniş təqdimatla birgə iştirakçılara məlumat verib. Həmçinin Qarabağ ərazisində yerləşən muzeylərimizə qarşı törədilən mənəvi terrordan da söz açaraq, erməni işğalçılarının oğurladığı, talan etdiyi eksponatların acı taleyindən bəhs edib.
O, həmçinin Azərbaycanın təşəbbüsü ilə 2008-ci ildə mədəniyyətlər və sivilizasiyalar arasında səmərəli və effektiv dialoqun qurulması məqsədilə irəli sürülmüş Bakı Prosesi barədə söz açıb. Bakı prosesinin davamı kimi “Mədəniyyət naminə sülh” (Peace4Culture) qlobal təşəbbüsünün də əsasının qoyulduğunu bildirib. Bölgədə davamlı sülhün təmin edilməsi və mədəniyyətin dirçəlməsi üçün bu təşəbbüsün önəmini vurğulayıb. Torpaqlarımız işğaldan azad olunandan sonra Azərbaycan dövləti tərəfindən geniş miqyaslı bərpa və quruculuq işlərinin başlanıldığı, xüsusilə də tarix və mədəniyyət abidələrinin, o cümlədən məscidlərlə yanaşı, xristian kilsələrinin də bərpa edildiyi diqqətə çatdırıldı.
Nazir ICESCO və onun Baş Katibinə bu görülən işlərdə dəstəyinə görə təşəkkürünü bildirdi və təşkilatın güclənməsinə, səmərəliliyinin artırılmasına yönələn islahatları alqışladı.
Вернуться назад