Ukrayna Baş Qərargahı: Rusiya qüvvələri Urojayneni geri almağa cəhd edib

Rusiya ordusu son sutka ərzində bir neçə hücum cəhdi edib. İşğalçı qüvvələr Baxmut, Maryinka ətrafında və cənubda bu yaxınlarda azad edilmiş Urojayne kəndi ərazisində irəliləməyə cəhd edib.

“Report” xəbər verir ki, bu barədə Ukrayna Silahlı Qüvvələrini Baş Qərargahının gündəlik xülasəsində qeyd olunub.

Belə ki, Baxmut istiqamətində rusiyalılar Bohdanivkanın şimalına, eləcə də Klişçiyivkanın şimalına və cənubuna hücum etmək üçün uğursuz cəhd etdilər. Maryinski istiqamətində Müdafiə Qüvvələri Maryinka şəhəri yaxınlığında Rusiya işğalçılarının hücumunu dəf edib. Şaxtar istiqamətində qarşı tərəf Ukrayna Silahlı Qüvvələrinin bu yaxınlarda azad etdiyi Urojayne kəndi ərazisində itirilmiş mövqelərini bərpa etməyə uğursuz cəhd göstərib.

Eyni zamanda, Ukrayna hərbçiləri Melitopol və Berdyansk yönündə hücum əməliyyatını davam etdirir.

Ümumilikdə, son sutka ərzində 32 döyüş toqquşması qeydə alınıb.

Xatırladaq ki, Ukrayna ordusu bir neçə gün öncə Urojayneni işğaldan azad edib.