Keçmiş ABŞ əsgəri rus pilotla dəyişdirildi
Rusiyada həbs edilən keçmiş ABŞ əsgəri rus pilotla dəyişdirilib.“Azadsəs.az” xəbər verir ki, bu barədə Rusiya Xarici İşlər Nazirliyi açıqlama yayıb.
Bildirilib ki, Rusiyada saxlanılan keçmiş ABŞ Dəniz Piyadası Trevor Rid ABŞ-da həbsdə olan rus pilot Konstantin Yaroşenko ilə dəyişdirilib.
“Uzun sürən danışıqlar prosesi nəticəsində bu gün Rusiyada mühakimə olunan ABŞ vətəndaşı Trevor Rid 2010-cu ildə ABŞ məhkəməsi tərəfindən 20 il həbs cəzasına məhkum edilmiş Rusiya vətəndaşı Konstantin Yaroşenko ilə dəyişdirildi”, - məlumatda deyilir.
Qeyd edək ki, rusiyalı pilot Yaroşenko 2010-cu il mayın 28-də ABŞ Narkotiklərlə Mübarizə Agentliyinin əməkdaşları tərəfindən Liberiyada saxlanılaraq, ABŞ-a gətirilib. Amerikalı Trevor Rid isə 2020-ci ilin iyulunda baş verən mübahisədə rus polislərinin "həyatını və sağlamlığını" təhlükəyə atdığına görə 9 il həbs cəzasına məhkum edilib.
