Pentaqon: “Rusiya hələ də Kiyevə zərbə endirə bilər”
“Rusiya hələ də qanadlı və ballistik raketlər kimi uzaqmənzilli zərbə vasitələrinə malikdir və Pentaqonun məlumatına görə, Kiyev, eləcə də Ukraynanın digər şəhərləri Rusiya tərəfindən raket hücumlarına məruz qala bilər”.Bu barədə Pentaqonun sözçüsü Co Kirbi brifinq zamanı bildirib.
3
Kremlin öz raketlərini “qərar mərkəzləri”nə hədəfləmək niyyəti ilə bağlı bəyanatlarına münasibət bildirən Kirbi Rusiyanın Kiyevə zərbə endirmək imkanının olduğunu təsdiqləyib.
Pentaqonun sözçüsü vurğulayıb ki, hətta Rusiya öz qoşunlarını Ukraynanın paytaxtından, Çerniqovdan, Ukraynanın şimal hissəsindən çıxarmağa başladıqda belə, ABŞ Kiyevin təhlükədən, xüsusən də hava təhlükəsindən xilas olduğuna əmin deyildi.
“Biz bu barədə dəfələrlə danışmışıq, hətta Rusiya qoşunlarının çıxarılması və yenidən yerləşdirilməsinin ilkin mərhələlərində də bu məsələ müzakirə olunub”, – deyə ABŞ rəsmisi xatırladıb.
O qeyd edib ki, Rusiya hələ də qanadlı və ballistik raketlər kimi uzaqmənzilli zərbə vasitələrinə malikdir.
Eyni zamanda, onun sözlərinə görə, təkcə Kiyev deyil, Ukraynanın digər şəhərləri də hələ də hava zərbələri təhlükəsi altındadır.
