Vidadi İsayevlə bağlı ittihamlara - Rəsmi cavab
18-08-2020, 10:02. Разместил: azadses
Bərdə rayon İcra Hakimiyyəti vətəndaş Elşən Mənsimlinin icra başçısı Vidadi İsayevin onun atasına məxsus torpağı ələ keçirməsi iddiasına münasibət bildirib.Bərdə RİH-dən “Qafqazinfo”ya verilən məlumatda E.Mənsimlinin iddiaları təkzib olunub və qeyd olunub ki, “Kəpəz” kooperativi Bərdə rayon XDS İcraiyyə Komitəsinin 30 dekabr 1988-ci il 18 nömrəli qərarı ilə qeydiyyata alınıb: “Kooperativin müraciəti ilə Bərdə rayon “Moskva” kolxozu ümumi yığıncağının 02.02.1989-cu il tarixli qərarı ilə kooperativə kolxoz torpağından müvəqqəti istifadə üçün 0,50 hektar torpaq sahəsi təhkim edilib. Lakin sənədlərdə ünvan göstərilməyib. Bərdə rayon İcra Hakimiyyətinin 23 dekabr 1992-ci il tarixli 295 saylı sərəncamında kooperativin əlavə fəaliyyət istiqamətləri müəyyən edilsə də, müəssisəyə torpaq ayrılması nəzərdə tutulmayıb.
Kooperativin təsdiq etdiyi 30 oktyabr 1999-cu il tarixli texniki pasportunda da müəssisəyə aid torpaq sahəsi qeyd edilmir. Yevlax 11 saylı Regional Vergilər idarəsinin rəsmi məlumatına əsasən, kooperativ yarandığı dövrdən bəri yalnız 06.04.2007-ci ildən 05.12.2008-ci ilədək vergi uçotunda olub və 05.12.2008-ci ildən Nəbi Allahverdiyevin öz ərizəsi ilə kooperativ ləğv edilib. Torpaq islahatı gedərkən 1988-ci ildə kooperativə müvəqqəti təhkim edilmiş həmin torpaq da daxil “Moskva” kolxozunun iddia olunan yerdə Bərdə rayonunun Gərənə kəndinin girəcəyində yerləşən bonitet balı 19 bal, yararsız V qrup 3,5 hektar torpaq sahəsi bələdiyyə torpağı kimi pasportlaşdırılıb.
Azərbaycan Prezidentinin təsdiq etdiyi 15.03.2002-ci il tarixli 274-IIQD nömrəli Qanunu, 27.10.2008-ci il tarixli 709-IIIDQ nömrəli Qanunun 16-cı bəndini əsas tutaraq Gərənə bələdiyyəsi özünün 25.05.2013-cü il tarixli və 11.06.2013-cü il tarixli qərarları ilə (0,5 və 3 hektar olmaqla) 3,5 hektar torpaq sahəsi sahibkarlığı inkişaf etdirmək üçün satılmaq məqsədilə müsabiqəyə çıxarılıb, müvafiq rəylər alındıqdan sonra hərrac vasitəsilə torpaq satılıb. Göstərilən torpaq sahələrini Əmrahov Eldar Çərkəz oğlu hərrac yolu ilə Daşınmaz Əmlakın 24.01.2014-cü il tarixli AN-1 № 0406050 və 0406051 nömrəli alqı-satqı müqavilələri və müvafiq olaraq 108 min və 17,8 min manat, cəmi 125,8 min manat vəsait ödəməklə sahibkarlıq məqsədi ilə satın alıb. E.Ç.Əmrahova bu barədə Əmlak Məsələləri Dövlət Komitəsinin yanında Daşınmaz Əmlakın Dövlət Reyestri tərəfindən RX № 0290067 və RX № 0290077 nömrəli mülkiyyət hüququna dair çıxarışlar verilib.
Vətəndaşın müraciəti ilə əlaqədar rayon İcra Hakimiyyəti və Gərənə bələdiyyəsi tərəfindən ona izah edilib ki, atası Nəbi Allahverdiyevin sözügedən torpaq sahəsinə heç bir mülkiyyət hüququ olmamışdır və onun göstərilən məsələ ilə əlaqədar məhkəməyə müraciət etmək hüququ var”.
Вернуться назад