Dövlət Komissiyası: “Ermənilər Qaradağlıda 57 nəfəri qətlə yetiriblər, 39 nəfər itkin düşüb”
17-02-2023, 14:00. Разместил: admin
“Ermənilər Qaradağlıda 57 nəfəri qətlə yetiriblər, 39 nəfər itkin düşüb”.
Bu barədə Əsir və itkin düşmüş, girov götürülmüş vətəndaşlarla əlaqədar Dövlət Komissiyasından məlumat verilib.
Bildirilib ki, 17 fevral 1992-ci il tarixdə milliyyətcə erməni beynəlxalq terrorçu, ASALA terror təşkilatının lideri Monte Melkonyanın rəhbərliyi ilə Azərbaycan Respublikası, Xocavənd rayonu, Qaradağlı kəndi işğal edilərkən dinc əhaliyə qarşı amansız soyqırımı həyata keçirilib.
İşğal zamanı kənddə olan 116 nəfərdən 57-si qətlə yetirilib. Kənd sakinlərinin qətlində Ermənistan hərbçiləri ilə yanaşı, mülki ermənilər, o cümlədən Qaradağlı kəndinə yaxın kəndlərin erməni sakinləri də yaxından iştirak ediblər.
Əsir-girov götürülmüş kənd sakinləri amansız işgəncələrə məruz qalıblar, onlara qarşı aşkar soyqırımı həyata keçirilib, etnik təmizləmə aparılıb.
Soyqırımı zamanı qətlə yetirilmiş 57 nəfərdən 27-sinin meyiti sonradan Azərbaycan tərəfinə qaytarılsa da, 30 nəfərin meyiti təhvil verilməyib. Bununla yanaşı, girov götürüldükdən sonra əvvəlcə işğal edilmiş Xankəndi şəhərinə, oradan isə naməlum istiqamətə aparılmış doqquz nəfərin də sonrakı taleyi barədə məlumatlar gizlədilib.
Hazırda Əsir və itkin düşmüş, girov götürülmüş vətəndaşlarla əlaqədar Dövlət Komissiyasında Xocavənd rayonu, Qaradağlı kəndinin işğalı zamanı 39 nəfər itkin düşmüş şəxs kimi axtarışdadır. Onlardan 33 nəfər kişi, beş nəfər uşaq (oğlan), bir nəfər isə qadındır.
Əsir-girov götürülmüş 50 nəfər (47 mülki, iki hərbçi, bir polis əməkdaşı) isə sonradan azad olunub.
Qeyd edək ki, Azərbaycan Respublikası, Xocavənd rayonu, Qaradağlı kəndinin Ermənistan hərbçiləri və terrorçu quldur dəstələri tərəfindən işğalından 31 il keçir.
Вернуться назад