Ekofəal: “Qarabağdakı yataqlarda monitorinqin aparılmasına şərait yaradılmasını tələb edirik” - FOTO

“Azərbaycanın Qarabağ iqtisadi rayonunda yerləşən faydalı yataqlar qanunsuz istismar edilir. Bu qeyri-qanuni fəaliyyətə dərhal son qoyulmalıdır. Eyni zamanda, yataqlarda görülən işlərin ətraf mühitə təsirinin qiymətləndirilməsi üçün ekoloji monitorinqlərin aparılmasına ciddi ehtiyac var”.

Bunu “Report”un Xankəndi-Laçın yolunda keçirilən etiraz aksiyasını işıqlandıran əməkdaşına açıqlamasında “Ekosfera” Sosial-Ekoloji Mərkəzin ətraf mühit üzrə mütəxəssisi Abdin Abbasov bildirib.

Dinc etiraz aksiyasına qoşulan ekofəal vurğulayıb ki, təbiətdən istifadə, sənaye müəssisələrinin quraşdırılması, yataqlarda qazıntı işlərinin aparılması və böyük layihələrin həyata keçirilməsi zamanı monitorinqin aparılması vacib şərtdir:

“Bu işlərin ətraf mühitə təsiri mütləq öyrənilməli və qiymətləndirilməlidir. Bizə şərait yaratmalıdırlar ki, orada monitorinq keçirək, yataqlarda görülən qanunsuz işlərin ətraf mühitə təsirini qiymətləndirək və nəticələrini ictimaiyyətə təqdim edək. Buraya gəlməkdə məqsədimiz budur. Hamı bilməlidir ki, yataqlarda hansı hadisələr baş verir və bunun təbiətə nə dərəcədə təsiri var”, - o bildirib.