Avtomobilində dərman qutusu olmayan sürücülər cərimələnəcək? - AÇIQLAMA
- 7-09-2020, 14:31
- Cəmiyyət
“Son günlər avtomobildə dərman qutusu ilə bağlı mövzunun nədən aktuallaşdığı aydın olmasa da, xırda bir məsələni diqqətinizə çatdırım”.''Azad Səs'' "Kommersant.az"-a istinadən xəbər verir ki, bunu yol hərəkəti üzrə ekspert Ərşad Hüseynov deyib.
“19 iyun 2020-ci il tarixdə Həm “Yol hərəkəti haqqında” Qanuna, həm də İXM-ə dəyişiklik edilərək avtomobillərdə olması zəruri hesab edilən bu qutunun adı dəyişdirildi. İndi o “dərman qutusu” yox, “ilk tibbi yardım qutusu” adlanır. Səbəb odur ki, bu qutunun içərisində dərman vasitələri yox, sadəcə həkiməqədərki yardımda istifadə edilə biləcək tibbi ləvazimatlar (qanaxmanı dayandırmaq, yaranı sarımaq üçün və s.) olmalıdır. Hazırda həmin qutunun tərkibi AR Nazirlər Kabinetinin 2019-cu il 9 sentyabr tarixli 399 nömrəli Qərarı ilə təsdiq olunub, lakin “Yol hərəkəti haqqında” Qanuna yuxarıda qeyd etdiyim dəyişikliyin qüvvəyə minməsi ilə əlaqədar NK-ya tapşırıq verilib ki, uyğun düzəlişlər edilsin. Yəqin ki, Nazirlər Kabineti 2019-cu il 9 sentyabr tarixli 399 nömrəli Qərarına dəyişiklik edəcək və sadəcə bu qutunun adını dəyişməklə kifayətlənməyərək, hazırda onun içərisində olması nəzərdə tutulan dərman vasitələrini siyahıdan çıxaracaq” – o qeyd edib.
