Şəhidin adı məktəb sinfinə verildi

Bakıdakı 6 nömrəli tam orta məktəbin 4c sinfinə Vətən müharibəsi şəhidinin adı verilib.

Məlumatına görə, məktəbin həmin sinfi bundan sonra şəhid gömrükçü Ülvi Hacıyevin adını daşıyacaq.

Qeyd edək ki, Ülvi Hacıyev 1994-cü il noyabrın 13-də Suraxanı rayonunda anadan olub.

2001-2012-ci illərdə Suraxanı rayonunda R.Ənnağıyev adına 141 nömrəli tam orta məktəbdə təhsil alıb. 2012-2016-cı illərdə Azərbaycan Dövlət İqtisad Universitetində (ADİU) üzrə ali təhsil alıb. 2016-2018-ci illərdə isə həmin universitetdə “biznesin idarə edilməsi” üzrə magistr dərəcəsinə yiyələnib. 2019-cu ildən Dövlət Gömrük Komitəsinin (DGK) Qırmızı Körpü Sərhəd-Keçid Məntəqəsinin postunda çalışırdı. Subay idi.

Ülvi Hacıyev 2018-2019-cu illərdə Azərbaycan Silahlı Qüvvələrinin sıralarında müddətli həqiqi hərbi xidmətdə olub. 2020-ci il sentyabrın 27-də Azərbaycan Silahlı Qüvvələri tərəfindən Ermənistan işğalı altında olan ərazilərin azad edilməsi və Azərbaycanın ərazi bütövlüyünün bərpa olunması üçün başlanan Vətən müharibəsi zamanı Cəbrayılın, Hadrut qəsəbəsinin və Füzulinin azadlığı uğrunda gedən döyüşlərdə iştirak edib. O, oktyabrın 19-da Füzuli döyüşləri zamanı şəhid olub. Uzun müddət nəşi tapılmayıb. 5 dekabr 2020-ci il tarixdə İkinci Şəhidlər xiyabanında dəfn olunub.

Prezident İlham Əliyevin müvafiq sərəncamları ilə Ülvi Hacıyev ölümündən sonra “Vətən uğrunda” medalı və “Füzulinin azad olunmasına görə” medalı ilə təltif edilib.

Mənbə: Modern.az